panormus

Chista è na storia di fantasia, nu cuntu fasullu, na diciria ca mi cuntavanu puru a mia, quannu di nicu iava alla Vucciria.

S’havi a sapiri, comu dicia u putiaru ca nè armali nè picciriddi si struppiaru iddi s’avianu sulu scantatu pi chiddu ca ci fu cuntatu.

Chista è la storia du coccodrillu ca si pistiava i picciriddi da Vucciria chistu è lu cuntu e chista è a diciria.

Cunta u paliemmitanu ca l’armalu arrivò ri luntanu du ciumi papiritu e nò canaluni natannu ma nuddu sapieva diri comu e quannu.

Natannu natannau, si iu ammucciari né funtani di la Vucciria e chistu u cuntava puru a Zà Maria.

Da funtana niscieva quannu avia pitittu chistu almeno è chiddu n’hannu sempri dittu.

Si c’era un picciriddu ca iucava nà la vicinanza l’armalu grapieva a vucca e s’unfilava na panza.

I picciriddi iavanu spiriennu ma ancuora nuddu ci iava cririennu.

Allura li cristiani da buiggata cuminciaru a circalli strata strata.

Ma i picciriddi un si truvaru e patri e matri si ficiru lu sannu amaru.

Sta storia un putia chiù iri avanti a genti priava tutti i santi pi fari spiriri l’armalazzu tantè ca quaiccunu ricia “l’ammazzu”.

Cinqu picciotti, li chiù curaggiusi cu benestari di cristiani religiusi armati di cutieddi già ammulati s’ammucciaru nà chiazza e quattru lati.

Quannu l’armalu ebbi pitittu nisciu da funtana rittu rittu e fu allura ca i picciotti guerrieri faciennu un savutu l’affirraru pu r’arrieri.

U coccodrillu cuminciò a stramazzari forse capiennu ca u vulianu ammazzari affierralu pa cura, affierralu pa tiesta c’un cuoippu i cutieddu ci ficiru a fiesta.

L’armalu iccatu ntierra ri vita un dava chiù signali aviennu nà curazza azziccatu u pugnali.

E mentri li picciotti si nni stavanu iennu i genti versu a chiazza stavanu curriennu

Di na picciridda s’intisi lu chiantu e fra i cristiani ci fu subitu scantu.

Versu la bestia avvicinnanu l’aricchiu si sintieva chiù fuoitti da picciridda u so picchiu.

Subitu all’armalu ci grapieru la panza ca era granni quantu na stanza infila li vrazza e nè vuriedda arriva scupriennu ca picciridda era ancuora viva.

Fra li genti ru quairtieri fu subitu fiesta e un ci fu chiù bisognu i sbattirisi a tiesta.

I picciriddi allura turnaru a ghiucari nà la funtana che era comu lu mari.

P’un farici scuiddari e picciriddi di l’armalu ra Vucciria ci pinsò un putiaru da via Argenteria.

Si fici fari un coccodrillu fintu impagghiatu e u misi rintra a putia nò tiettu appizzatu.

I picciriddi ca trasianu nà putia unn’è ca taliavanu sulu a tia.

Ca tiesta calata un putievanu stari senza l’armalu pi fuoizza taliari.

Chista è na storia di fantasia, nu cuntu fasullu, na diciria ca mi cuntavanu puru a mia, quannu di nicu iava alla Vucciria.